مشتريات معرض العطور| شنو أخذت من معرض العطور ٢٠١٨

 

السلام عليكم جميعاً
طيّب الله مساءكم كون هذه تدوينة عن العطور و معرض العطور لهذه السنة
!بس أول شيء ببدأ بإعتذار لتأخر التدوينة، ماعندي عذر غير اني تكاسلت و اتمنى يكون مقبول
.
.
شفتوا ضخامة المعرض لهذه السنة! من الديكورات الشاهقة إلى التغطيات الضخمة

و طبعا ماننسى فقط الخيمة المخصصة لبوتيكات، من تنسيقات المكان إلى صاحبات البوتيكات
ممكن نتكلم عن جمال سندس القطان، كيف ممكن شخص يكون بالصور و الطبيعة آخاذ؟ جميلة الله يحفظها

 

 

تمنيت لو كنت مصورة بس مع الزحمة و تصاعد النبض عندي و تقطع الانفاس ماسمح لي حتى أمسك تيلفوني
ماحب التكدسات البشرية.. توترني
.
.
.

نرجع لأبطال التدوينة العطور و أول عطر.. أو عطور بالجمع

من عطورات مزاج
محل أول مره اسمع فيه، للتو افتتحوا محل في بلازا مول – حولي
سابقا يبيعون بانستقرام ، أظن هذه أول سنة لهم بالمعرض
لما كنت اشوف التغطيات اللايڤ بسناب و ستوري انستقرام أغلب الناس تُثني على ديكور البوث
بس مو القطع الديكور الهندسية و الورد المتدلي من السقف اللي لفت انتباهي

قصة تضحك .. كان ببالي (مخربطة) هو المحل الي يبيع معطرات الجو التركية المشهورة و اللي كان يبيع .. اللي ممكن أضيف كان خنقول (تم اختياره بعناية لبيع العطور😏) اعطاني ورقة مرشوش عليها معطراتهم الخاصة فيهم و طلعت محبطة لان مالقيت المعطرات الجو التركية و معاي الورقة
نص ساعه و رجعت أركض اشتريه 😂 لهالدرجة ما قاومت.
و شريت عطر و عطر ثاني بعد
غردت أكثر من مره شكثر مستانسه بالاكتشاف الجديد و المميز فعلاً
.
.

La terre
حسب وصفهم : عطر مركز من العود الكمبودي، جلد، الباتشولي الأندونيسي و التبغ

حسب تجربتي: العطر فيه بخور و مو صريح بخور و غير طاغي فواح، جميل و أنا اتحرك ألقط نفحات بخور و يظل يومين عالق بالملابس
.
.

معطر الجو Doux

ماحصلت وصف
لكن اخذوه على ضمانتي، لان اولا ماعمري جربت معطر جو نفسه
😂 ثانيا محد بالعائلة جربه و ماسأل عنه! لدرجة بنت خالتي عطرت شعرها فيه
يتميز ان ريحته مو فواحة.. و أقرب تشبيه له للحظات لما تشمين شيء حلو بس ماتدرين وين
خصوصا لما يركد عالاثاث مع بخور القرشي (صورته تحت)
لكن أنا مستاءة من نقطة، أذكر اخذته بـ ٨ د.ك و حاليا عارضين سعره بـ ١٠ د.ك 😕
.
.

Le souffle

حسب وصفهم : مزيج خلاب من زهرة البرتقال، البرقاموت (الليمون العطري) ، الخوخ ، الصندل، المسك و العنبر

حسب تجربتي: اوكااي وجود الفواكة بالوصف ظلم العطر، مع ان ماعندي اي مشكلة ضد الفواكة بس مافضلها بالعطور، أكثر يميل إلى رائحة بودريه أظن بفضل المسك والصندل
أظن اكثر شي محببني بعطورات مزاج.. النظافة! و ماقصد رائحة النظافة أقصد لما احط من عطورهم فيه نظافة و اتزان ، يعني مافيه بزيادة عود أو بزيادة مسك أو بزيادة برتقال. فقط توازن

كلا العطرين بـ١٨ د.ك
.
.

اختيارات الوالدة
بيننا الاثنين هي المدمنة الحقيقية للعطور
😂 عطر ٥٠ مل يقعد عندي ٣ سنين هي تخلص ٥ الحجم الكبير بشهر واحد
.

.

أول اختيار
بخور عود من الشايع
مايتحصل بالمحلات العادية و متوفر بوفرة بالمعرض
بخور عود وبسعر حلو
اتوقع كان بحدود ٨،٨٠٠ د.ك
.
.
.

Miroir Des Majestés by Thierry Mugler

عطر فخم لكن ايضا من اختيارات الوالدة مافضله بزيادة قوي على حاسة الشم عندي
يحتوي على الياسمين و العنبر والعود
Fragrantica و حسب موقع
العطر أُطلق حصريا للشرق الأوسط كون العطر شرقي
.
.
Twilly d’Hermès
اخذته من سيفورا، مادري ليش صورته معاهم
اتوقع عشان اخذته بنفس الفترة
عطر مميز حقيقي، ريحته ورد و باودري بس فيه شوي حده
يحتوي الحمضيات والزنجبيل والمسك والفانيلا والصندل
المميز فيه لما يبرد! يتحول لعطر مختلف! دافئ وراكز أكثر اذا صح القول و مناسب للشتاء
.
.
.

خلطة القرشي
حسب الموقع : عنبر، مسك و خشب العود الدّافئ مع خلاصة الفواكه والأعشاب الرّائعة
مع ان مافيه لُبان لكن اشمه فيه والله
أكثر شهرة عندهم و من مفضلات امي حاليا، مُفضل بمرتبة (التسريحة) حاطه على التسريحة عشان توصله أسرع من دولاب العطور! ايه لهالدرجة حابته
و لما يبرد تخف حدته و يصير فواح بشكل حلو وانثوي و نظافة، عرفت ليش وايد ناس تحبه
.
.
بخور القرشي
يحتاج اقول شيء؟ احس كل بيت عندهم هالبخور مادري ليش
هو هذا البخور المذكور أعلاه
يفوح بالنظافة، ماعمري شفت بخور نفسه
بس سيئاته يحترق بسرعة! يعني بالكثير ٣٠ ثانية و اغير الكسرة ولا راح يدخن و يطغي الدخان على العطر الحلو
اتوقع عشان هالسبب حجمه كبير و كميته كثيرة
كان بحدود ٢٥ د.ك، بس يسون عروض و يوصل لـ ١٨ د.ك، اذا ماخاب ظني
و مره كان عرض اشتر ١ و الثاني مجانا من نوعية هذه البخور ( الازرق و الوردي)
.
.
.

عطر إبداع من جنيد
هو صراحة أنا دليت امي عليه و عجبها بالمثل، بس عقب مادري شنو صار معاي استثقلته
هو شرقي وحسب انستقرامهم مكوناته خشب و صندل و الاكثر مبيعاً
و كان سعره بحدود ٩ د.ك
.
.
.

شمس من أجمل
عندهم مجموعة الشمس مكونه من ثلاث أنواع : دهن عود مركز، دهن عود بخاخ و مخلط بخاخ
هذا دهن عود بخاخ
ما أجرؤ استعمله لان ماحب طيب العود القوي مثل هذا، أحب العود يكون الخلفية أو الصدى بالعطور… كلمات صحيحة لوصف عطر صح ><
بعد التفكير و التجربة. لما يبرد يصير حلوووو! مبدئيا كان مايشجع اجربه بس غير رأيي صراحة
.
.
.
الخلطة الملكية من البيت الخليجي
من أفضل ماجربت
و من الأكثر مبيعاً عندهم
و حسب انستقرامهم يحتوي على المسك والعسل والزيوت العطرية
و مايحتاج اصلا المسك واضح فيه و جدا انثوي، لدرجة يخليك تحببن نفسك 🙌❤️
تحبين نفسك لدرجة وذك تزوجين نفسك.. اذا ماعمرك حبيتي نفسك لدرجة ودك تزوجين نفسك ضروري ترتبين أولولياتك بالحياة اختاه
كان سعره ٢٠ د.ك
.
.
.

جمانة من عطورات الروقي
معطر للشعر و الجسم
هذا العطر المفضل عندي!!!
صاير مسك و نفحة عود خفيفة
صراحة ماعرف أوصفها لان احصل نفسه بكذا عطر و جدا احبه
يستاهل تجربونه
كان سعره ١٢ د.ك

.

.

زيت الشاي الاخضر و عشبة الليمون من خان للصابون
مو من معرض العطور مادري ليش صورته معاهم
بس انه منعش و فواح و خصوصا عقب شاور سريع الصبح

و يمشي حلو مع العطور ❤️
.
.
.

و اخر شيء متفرقات من العناية بالبشرة
نستغل العروض ايام معرض العطور تجي أطقم أحجام الصغيرة مانحصلها عادة بالمحلات
مثل نوكس كل معرض احصلهم و اخر الايام يسون خصومات قوية ، اذا حصلتوا مرطب الشفايف مالهم لايطوفكم
و هذا زيت كلارنس (أقصى اليمين)ـ
Clarinse blue orchid face treatment
أصبح حاجة لايستغنى عنها عند الوالدة
اتوقع مخصص للبشرة العادية، مايظل طبقة دهنية على سطح البشرة
!! و مره شفت وحده تخلط الزيت مع القناع الطين البودري
.
.
.

و خلصنا!!! شكراً لقراءتكم التدوينة